الأرشيف الشهري: فبراير, 2016

اسحب جملة واشلف

بعد النموذج يلي حافظ عن كل موضوع فكرتين ثابتتين بيشلفك هني كل ما أجت سيرة هالموضوع .. طلع لسا في النموذج الأظرف .. هاد بيكون مجهز برميل كلام، شو ما حكيت بيمد إيدو وبيشلفك كم جملة من هالبرميل، وبغض النظر تماماً إذا بتركب كجواب عالشي يلي عم تحكيه أو لاء !



فدرالية ألمانيا بعيون كوردية

ألمانيا أكتر مثال روح قلبن للآبوجية وباقي منظري الانفصال أنن يطرحوه كنموذج لنظام الحكم الفدرالي الناجح يلي بدن يعملوا متلو ..
لكن مع شوية تعديلات بالتطبيق
عم أتخيل مثلاً نوردراين فيستفالن يكون عندها جيش كامل وقوات مسلحة مو داخلة تحت السلطة المركزية الألمانية وإنما ولاءها وعلاقاتها وتسليحها وتمويلها شغال بشكل كامل ومعلن مع إحدى الميليشيات الناشطة بشرق بلجيكا يلي عم تحارب الدولة البلجيكية!
عم أتخيل سكان نيدازاكسن يحسوا حالن هولنديين أكتر من إحساسهن بأنن ألمان ويطالبوا تصير اللغة الرسمية لنيدازاكسن هولندي! هيك خيو الشباب هولنديين أصلاً مانن ألمان!
أو مثلاً راينلاند بفالتس يكون عندها علاقات وتمثيل وبعثات دبلوماسية خاصة فيها بدول خارج ألمانيا وبشكل مفصول تماماً عن السفارات الألمانية! سفير راينلاند بفالتس في كندا هههههه ! سفارة راينلاند بفالتس في أستراليا هههههه !
أو مثلاً ببايرن يكون عندن علم خاص فيهن وما يرفعوا العلم الألماني! بيارنة الشباب مو ألمان !
أو مثلاً واحد من شتوتغارت يسألوه بشي مكان برا ألمانيا من وين أنت؟ يجاوبن أنا من بادن فورتمبيرغ !!




مؤهلات مكافحي الإرهاب

قال الأخ عم يتمسخر ويستهزء أنو السعودية وتحالف إسلامي ومكافحة إرهاب! أنو شو قالوا التلاتة لبعض! بالفعل مهزلة وشي يدعو للسخرية!
يعني كان ممكن بطريقةٍ ما أتفهمو للأخ وأتفهم وين شايف المهزلة بهالثلاثي وليش، لكن أبداً ماممكن أفهمو وبالعكس رح أعملو هوي المهزلة لما يكون هوي نفسو شايف هالثلاثي مهزلة بالوقت يلي شايف فيه بشار الأسد وميليشياتو مكافحي إرهاب من الطراز الرفيع!



إرهابي مجرم vs. حضاري ذو رأي سياسي

يُسمّى مؤيد داعش والقاعدة بال”إرهابي”، ويُسمّى مؤيد بشار الأسد وجيشه ب”ذي الرأي السياسي”!
يُدعى لقتل عناصر وقادة داعش والقاعدة باعتبارهم مجرمين تكفيريين رجعيين يجلسون في الخيم يطيلون ذقونهم ويقتلون بالسيوف والسواطير، ويُدعى للحوار مع عناصر وقادة الجيش الأسدي باعتبارهم حضاريين تقدميين يجلسون في المكاتب يحلقون ذقونهم ويقتلون بالطائرات والصواريخ!



السوري يلي صارلو عشرات السنين بأوروبا

بينصحك عزيزي السوري يلي صارلو عشرات السنين بأوروبا أنك تنتبه قدام مين تحكي رأيك تحذيراً وخوفاً عليك من كتّيبة التقارير والمتعاملين مع الأمن من السوريين يلي بيشتغلوا هالشغلة حتى وهني بأوروبا وبيأكّدلك أنو ما تفكر حالك حتى إذا صرت بأوروبا يعني خلص نفدت وصرت حرّ وبيعطيك عشرات الأمثلة عن ناس تبهدلت وانداست وانشحطت واختفت بأول نزلة مطار لإلها بسوريا بسبب كلمة في حديث عابر.
بعدين هوي نفسو بعد شي نص ساعة من الحديث بيتساءل مستغرباً ومستنكراً أنو أخي الناس ليش عملت ثورة بسوريا!؟ شو كان ناقصها يعني وشو كان بدها بهالشغلة!؟
بالفعل! بطر خيو بطر شو بدك تعمل!



انتهاكات غير صارخة

أحلى شي لما يستعملوا تعابير متل “انتهاك صارخ” أو “قرار دولي مُلزم” ..
أنو يعني في انتهاكات مو صارخة مثلاً؟ أو في قرارات دولية غير ملزمة مثلاً !؟