الأرشيف الشهري: ديسمبر, 2015

لؤي حسين .. احترنا يا قرعة!

لؤي حسين:
التصريح المنفلت الصادر عن منسق الهيئة العليا للمفاوضات رياض حجاب الذي ينعي فيه الشيخ زهران علوش لا يمثل الهيئة إطلاقا ولا يعبّر عن موقفها طالما أن أحد أعضائها على الأقل اعترض على ذلك قبل إصدار التصريح.

وسائل الإعلام:
تيار لؤي حسين يرفض تعزية “حجاب” بقائد جيش الإسلام.

لؤي حسين:
إن سريعي الانفعال والهائجين وضعيفي القراءة والتمعن وبذيئي الكلام والخطاب والمأجورين اعتبروا بياننا الذي أصدرناه ينكر على السيد حجاب أن ينعي الشيخ زهران علوش.

سريعي انفعال وأوباش وفهمن على قدو يا أستاذ لؤي شو بدك تساوي! غريب من وين بيجيبوا هالحكي أنا ما عم بفهم!



المطران آيدين: اخترعتُ التسمية الآرامية نكاية بالآثوريين

المطران حنا آيدين بكل وضوح وصراحة: نحن مو آراميين، لكن أنا اخترعت هالتسمية قبل حوالي 30 سنة بسبب “عكسيّة” مع الآثورية فقط لا غير !! قبل حوالي 30 سنة عصّبت من أعضاء بالحركة الآثورية لأني شربتن شاي وقهوة ومع هيك ما قبلوا الكلبين يسمعوا كلمتي وأصرّوا يضلوا يقولوا أنو نحن شعب آشوري قمت لهيك عصبت منن وكتبت مقال اتهمتن فيه اتهامات بتوصل لدرجة أنو تتسكر مكاتبن بألمانيا (اتهامات متل أنن عم يعملوا أنشطة إجرامية ضد القانون والدولة الألمانية) وبلشت اخترعت تسمية آراميين وعملت ليلاً نهاراً على تقويتها بس نكاية!




مجرمين بين طالبي اللجوء

عزيزي المؤيد كامشلو صورتين تلاتة لكم متطرف مرتكب جرائم بسوريا جاي يقدم لجوء بالدول الأوروبية ومفكر حالو كاشف المؤامرة ونازل فيهن نشر وعرض أنو شوفوا الإثبات شوفوا تفرجوا هدول هني التكفيريين الإرهابيين الحيوانين هدول هني هدول يلي كنا نقول عنن وما كنتو تصدقونا خدوا شوفوا .. مكيف الحبيب أنو ياباااااااا يعني مو بس صارت قصة التكفيريين يلي اخترعوها حقيقية، لا وصار عندن صور كمان يفرجوها! وصاروا هدول التكفيريين هني نفسن عم يهددوا أوروبا! لسا زيت على زيتون!
حبيبي، مقابل كل مجرم صاحب فظاعات من عناصر التنظيمات المتطرفة السابقين يلي جاي يقدم لجوء بأوروبا في عشرات المجرمين من أصحاب الفظاعات من عناصر الميليشيات الأسدية يلي مفظعين متل هدوك وأكتر وكمان جايين يقدموا لجوء بأوروبا! وكمان معروفين وموثقين ومصورين ومنشورين .. مو بس أنت عندك صور



منحبكجيات 2

– بتعرف لك كنت عم بقرا عن شاعر علوي اسمو حسن الخيّر قطعولو لسانو وأعدموه سنة 1980 بسبب قصيدة كتبها !!
– اي لكن أخي شوف العلوية من يوم يومن مظلومين ومضطهدين بس لمجرد أنن علوية، لاء وهاد شاعر كمان لسا ذنبو أكبر بعقليتن المتحجرة، طبعاً أكيد الإخوان قتلوه متل ما هلا داعش عم تقتل وتدبح، التاريخ يكرر نفسه، وكلو مشان شو قال لأنو ألقى قصيدة! أيمت بدنا نخلص من هالعقلية الرجعية المتعفنة التكفيرية يلي بتقتل وبتدمر الفن والإبداع والإنسانية وما بتفهم إلا بقطع الأعضاء وسفك الدم، لسا شوف إذا راح بشار شو رح يعملوا التكفيريين بالأقليات وبكل حدا متحضر ومبدع وما بيوافقهن بالعقلية السلفية الجهادية تبعن.
– بس لحظة شوي، حافظ الأسد هوي يلي قطعلو لسانو وقتلو للزلمي O.o .
– هاه؟ خيو يلي عم بيصير لعبة كبيرة كتير خيوطها مشربكة ومخطط مدروس ومعقد وأكبر مني ومنك، هية السياسة شغلة وسخة، في دول كبيرة عم تخطط وتنفذ وتتحكم بمصير العالم، ما حدا عرفان شو عم بيصير.