الأرشيف الشهري: سبتمبر, 2015

العقل الروسي

حقيقة معروفة جداً: الغالبية الساحقة من برامج الكمبيوتر والانترنت هي صناعة أمريكية، والغالبية الساحقة من كراكات وقرصنات وسرقة وتخريب برمجيات الكمبيوتر والانترنت هي صناعة روسية. عمل الغالبية الساحقة من المبرمجين والمهندسين والمبدعين الغربيين ينصب على زيادة الابتكار في صناعة التكنولوجيا وإيجاد ما يجعل الحياة أسهل وأمتع، بينما ينصب اهتمام الغالبية الساحقة من المبرمجين والمهندسين الروس على صناعة الكراكات واختراق المواقع وسرقة البيانات.
والملفت أن الروس دائماً ما يفتخرون بدورهم هذا! الإبداع في نظر الروس يتلخص في القدرة على تدمير النجاح!



طاير عقل الممانعة بالتعاون مع الغرب!

أحلى شي لما المنحبكجي يقلك اي وهي أميركا والغرب عم ينسقوا مع السيد الرئيس مشان ضرب الإرهابيين.
اي صحيح هالحكي، مزبوط، فعلاً صار واضح هالشي وماضل في شك أنو الأميركان والغرب عم ينسقوا مع نظامك. صار واضح أنو التياب يلي صارلكن أنت ونظامك 4 سنين بدكن تلبسوها للمعارضة وللثورة (تياب التعامل مع أميركا والغرب) اليوم أنت ونظامك طاير عقلكن من الفرح بأنو طلعلكن تحطوا فردة قميص منها على جسمكن!



ليش أصالة نصري “خائنة للوطن”؟

لأنو بزمانو حافظ الأسد (صاحب الدولة السورية) سمحلها تتعالج بالمستشفى وما أخد منها مصاري، وبعد عشرين سنة لما ابنو قتل الناس أصالة ما صفقتلو رداً لجميل أبوه معها.
تماماً هاه، بالضبط هي هية كل القصة ومافيها بأمها وأبوها، ويلي المؤيد بيحكيلك هية وبيفقعك نظرة هيك من كعب الدست أنو أفحمك وبرهنلك بالدليل القاطع فداحة خيانتها!



سليمان طلع براءة

أحلى شي محبي العقيد حسان الشيخ يلي قتلو سليمان الأسد، لك قال الشباب كانوا متوقعين سليمان يتحاسب ولهلا مو مصدقين شلون طلع براءة!!!!!
لك يا شباب يا شباب كم مرة بدنا نعيدها، السيد الرئيس ما دخلو، قضاء هادا قضاء، القضاء هيك حكم، ماحدا فيه يتدخل، بترضوها مثلاً الأمن أو السيد الرئيس لا سمح الله يتدخل بشغل القضاء ويقلن لازم سليمان ينحكم!!؟ احترموا مؤسسات الدولة واسكتوا. السيد الرئيس صارلوا 4 سنين فلح سوريا فلاحة مشان يحمي هالمؤسسات تجوا آخر شي تشككوا بنزاهة وحرفية شغل هالمؤسسات! بدكن من كل عقلكن بيت الأسد يملوا عالقضاء شو يعمل وشلون يحكم!!!!؟ أعوز بالله، والله إذا صار هيك شي لتقوم ثورة بسوريا بعدين! لكن شو مفكرين



نعم كان مجرم وكنا خايفين

واحد من أهم أسباب مدح قسم كبير من الجيل الأكبر مننا لحافظ الأسد هوي أنو مالن عين يقولوها بوضوح وصراحة اي نعم كان مجرم وما قدرنا نعملو شي لأنو كنا خايفين منو.
فقسم بيهرب لمدح حكمتو، وقسم تاني بيهرب للتغنّي بقسوتو وإجرامو.



الغرب تآمر علينا بأنو ساعدنا

واحد ذامم العرب والمسلمين ومادح الألمان والنمساويين، في واحد تاني كاتب تعليقاً عليه:
“هذا ما اراده الغرب من استقبال اللاجئين والترحيب بهم ان نصل الى هذه النتيجة”.
فعلاً! أنو معقول يعني مثلاً أنو نصل إلى هذه النتيجة !؟ معقول إذا الغرب ساعدنا نقوم نروح نقول أنن ساعدونا وإذا العرب والمسلمين ما ساعدونا نقوم نروح نقول والله ما ساعدونا !!؟ بترضوها !؟ معقول نحن شعب الممانعة العتيد نشوف الأمور هيك ببساطتها ووضوحها ومتل ما هية لا سمح الله !!!؟ معقولة يعني !!؟ ولك خسه !! شعب التوجيه المعنوي وحافظ الأسد نحن ولك عمو وين رايحين أنتو بهالعجقة، أكيد في مؤامرة ورا القصة، هني العرب ما ساعدونا فقاموا الأوروبيين تآمروا علينا بأنن ساعدونا بس مشان نقول أنن كويسين وساعدونا، لكن شلون!