الأرشيف الشهري: يوليو, 2015

فصلكن بسبب عدم الالتحاق بالدوام

يقول بشار الأسد: “الوطن ليس لمن يسكن فيه وليس لمن يحمل جواز سفره أو جنسيته، الوطن هو لمن يدافع عنه ويحميه.”
أعزائي مؤيدي الأسد يلي برا سوريا، يالله لشوف، بحسب نظرية قائدكن، يلي كالعادة ملتزمين بتأييد كلامو، من هلا ورايح أنتو مانكن سوريين ولا إلكن علاقة بسوريا لا من قريب ولا من بعيد.
طبعاً نحن هالحكي ما بينطبق علينا ولا دخلنا فيه ولا بيعنينا بشي، متلو متل كل باقي العلاك تبع بشار الأسد.
يالله عيني يالله ضبولنا هالعدة وقوموا، سوريا إلنا نحن فقط، أنتو قائدكن فصلكن بسبب عدم الالتحاق بالدوام.



آل الأسد بالاسم

كل حديث عن الوضع السوري يُتجنب فيه ويُستبعد منه بشار الأسد وآل الأسد بشكل واضح وصريح ومباشر ومسمّى (غالباً بحجة اتساع الأفق وعدم الشخصنة) هو ببساطة تضييع وقت وحديث لا فائدة منه إطلاقاً، يبقى عبارة عن كلمات تدور وتدور وتدور عبثاً في الهواء حول لبّ الموضوع لتنتهي دون أن تقترب منه حتى، وكأن الحديث لم يكن أصلاً.



“قوّي” حساب الفيسبوك!

بس لو أعرف مين موصل للناس قناعة أنو اللايك والشير والنكز بتقوي حساب الفيسبوك ضد التهكير!! لك شو هي “بتقويه” يا الله! ههههههههه مافي شي اسمو بتقويه! شو بني آدم هوي رح تعطيه فلان مادة لتقويلو مناعتو ضد فلان جرثومة أو تزيدلو فلان مادة ليزيد تركيز أو كثافة فلان شغلة بجسمو!
لك الكمبيوتر ما بيفهم هالحكي يا عيني .. جوا الكمبيوتر مافي هيك شي إطلاقاً .. الكمبيوتر ماعندو حساب قوي وحساب ضعيف، الكمبيوتر أصلاً ما بيفهم أنو يلي جواتو هني حسابات ناس! ما بيعرف أنو هاد حساب فلان وهداك حساب علان! الدنيا جواتو كتير مختلفة، واللايك والشير لا علاقة لها لا من قريب ولا من بعيد بالتهكير والتقوية!
شوي تاني بيقلك اشتري لكمبيوترك صندوق حديد حطو فيه وشيل الفيش كل ما تخلص شغل مشان تكون محمي ضد التهكير



داعش لا تمثل الإسلام لقتلها لمسلمين

وحدة من المهازل هية لما تشوف مسلم كتير محموق من داعش وعم ينتقدن ويجرّمن وأنو هازا ليس بالإسلام الصحيح وأنو ما هاكزا تكون الخلافة، بيطلع بالأخير حبيبنا مستند بهالرأي تبعو على أنو هدول يلي عم تقتلن داعش هني كمان مسلمين والإسلام الصحيح لا يقتل مسلمين !!
بالله!؟ يعني ياريتك ضليت ساكت وما حكيت كان أشرف .. أنو حكيت حكيت وآخر شي طلع معك أنو هازه ليست بدولة خلافة لأنو الخليفة المسلم الحقيقي لا يقتل المسلمين !!! اي؟ طيب بالله تشفلنا معلم من عندك بخصوص غير المسلمين في ظل الخلافة الصحيحة يلي متخيلها معاليك شو الترتيب ؟