الأرشيف الشهري: يناير, 2015

الديمقراطية لا تتجزأ

للمرة ألف، الديمقراطية لا تعني أبداً بالضرورة أنو يصل للحكم الطرف يلي بدنا هوي.
هي الشباب بتونس انتخبوا ديمقراطياً شخص من النظام القديم، وقبلن الشباب بمصر انتخبوا ديمقراطياً شخص من الإخوان .. الخيارين بالنسبة إلي مرفوضين (طبعاً “بالنسبة إلي” قصدي لو صار هالشي بسوريا، أكيد مادخلني لا بتونس ولا بمصر ولا ادّعيت بيوم أني بعرف بوضع بلدن أكتر منن ولا حكيت بشي بيخصّن، عم أحكي عن الفكرة)، الخيارين بالنسبة إلي مرفوضين (الإخوان والنظام القديم) لكن لو صار هالشي بسوريا وفاز بشكل ديمقراطي طرف ما بيعجبني ما رح كون إلا رضيان، يمكن مو مبسوط، بس رضيان .. المطلوب أبداً مانو وصول طرف بعينو للسلطة أو شخص بعينو للمنصب بقدر ما المطلوب هوي الديمقراطية، والقبول بنتائج هالديمقراطية حتى لما ما تعجبنا، غير هيك مابيكون اسمها ديمقراطية.



الإنجاز أنو بشار كزب بالحارة !؟

قال بشار الأسد كزاب وما راح على جوبر!
اي؟ لنفرض ما راح على جوبر .. راح عالحارة إكس، و اي نعم الحارة كلها تحت سيطرة جيشو، طبيعي يعني ما رح يروح على منطقة جيشو مو مسيطر عليها ! وكل شخص من يلي بيّنو بالصور ويلي حولهن ويلي حول حولهن بيكون معمولّلو دراسة أمنية للجد السابع بالعيلة، والأكل يلي أكل منو وكاسة الشاي يلي شربها مأمّنين من لحظة طبخن للّحظة يلي كان عم يتزقنبهن فيها، واي نعم الطلعة كانت مشان يعمل حركة إعلامية أكتر منها حرص على متابعة الأمور عالأرض، أساساً هوي شخصياً مالو علاقة ولا بيفهم شي بالمعنى العسكري بإدارة الحرب عالأرض حتى وهوي قاعد بقصرو، المقصد هوي رسائل إعلامية طبعاً، ما اكتشفتوا جسيمات نووية جديدة يعني!
بس الخلاصة: بشار الأسد عم يتفتل يوم راس السنة بالشام وأغبياء الإئتلاف صارلن 4 سنين عم ينتخبوا رئيس ائتلاف، وآخر ما توصلوا إليه بعد 4 سنين أنن راحوا اتفقوا مع هيئة التنسيق على دعم الجيش بمكافحة الإرهاب، ومكيفين على حالن قال اكتشفوا أنو بشار كزاب ما كان بجوبر!