الأرشيف الشهري: سبتمبر, 2014

أكيد الله موجود

أتأكد كل يوم أكثر فأكثر من حقيقة وجود الله، فلا يعقل وجود كلّ هذا الكمّ من اللاعدل بهذا التركيز وبهذه الطريقة بدون وجود قوة خفية كبيرة ورائية مركزية تعمل عليه بكل جدّ ليلاً نهاراً



الحفلة الدولية على داعش

يالله بلشت الحفلة الدولية يا شباب
بلش المزاد
كل دولة بدها تأدي فروض الطاعة وتضرب كم فرشاية لأميركا تتبرعلا بكم غارة
حاسس الوضع متل زعيم القاووش لما يقرر يسلخ شي واحد من السجناء الدراويش قتلة فهوي مجرد يقوم من تختو ويبلش يمشي باتجاه تخت الدرويش، بيكون ما ضل حدا من باقي السجناء ما شارك بكم كف ورفسة وبوكس
بكرا حتى جمهورية نيكاراغوا الشقيقة رح تقرر إرسال كم طائرة للمشاركة بالحلف الدولي!
حاسس هالحلف شغال على مبدأ المسيرات والاحتفالات البعثية، يلي ما بيشارك أميركا رح تكتب اسمو!
وطبعاً سبحانو الله ماحدا بيخربط وبيضربلو شي رصاصة عالجيش الأسدي هاه! إطلاقاً! دقة لا متناهية بالتنفيذ! التعليمات الأمريكية كل التركيز على داعش، بنكسر أيدو يلي بيضرب رصاصة عالجيش الأسدي!



كيف تثبت أنها ثورة

نصيحة للشعوب الشقيقة :
إذا بيوم من الأيام عملتوا ثورة وكان في صعوبة بأنكن تشرحوا لشريحة من الناس أنو هاي اسمها ثورة ومانها نزاع مسلح قاموا فيه الزعران والرعاع ناتج عن مؤامرة هدفها تخريب البلد ، فأسهل شي بتعملوه أنكن تحولوها فعلاً لنزاع مسلح ، هيك بس ممكن يقتنعوا أنو بالبداية فعلاً كانت ثورة ! وزيدوا الفظاعة والشناعة والتطرف بالنزاع ، هيك بتخلوهن هني نفسن ينظّروا حتى عليكن بروعة الثورة بالبداية ! ولا تتفاجؤوا أبداً إذا طلع معن أنن هني أصلاً كانوا مع الثورة في بدايتها !!