الأرشيف الشهري: أغسطس, 2014

المسيحيون والمواقف المبدئية !

من المفارقات المضحكة المقرفة، في فترة بداية الثورة مع بداية ظهور المظاهر غير المألوفة في الجزيرة السورية كالمظاهرات وتحدي الأمن وما إلى هنالك من نشاطات توحي بالنزعة إلى التمرد، ظهرت أيضاً نشاطات حزب العمال الكردستاني التي كانت تعد الأكثر حدّية واندفاع وسرعة وغرابة (من ناحية الطروحات والأسلوب والقوة)، ونتيجةً لاختلاط الحابل بالنابل ظن كثيرون أن الحزب يقف مع الثورة ضد النظام، فاصطفت الغالبية المسيحية حينها ضد الحزب مستذكرةً كل سلبيات الحزب وتاريخه المشؤوم ومشروعه الانفصالي وأعماله المجرمة وأهدافه اللاوطنية و … الخ رافضةً له رفضاً مطلقاً ومُلقيةً باللوم على الثورة معتبرةً إياها السبب في تنامي قوة هكذا تنظيمات وحركات ومعتبرةً نجاح الثورة يعني نجاح هؤلاء في تحقيق مشروعهم بتكريد المنطقة وجعلها “كردستان” واضطهادهم كمسيحيين.
بعد مرور فترة واتضاح أن الحزب يقف مع النظام ضد الثورة، بقدرة قادر أصبحت الغالبية المسيحية ترى في الحزب ذاته حزباً وطنياً وسنداً للدولة وحامياً للمنطقة وديمقراطياً مع الأقليات مثنيةً على جهود الحزب الاستثنائية في تنظيم وإدارة المنطقة ومعتبرةً إياها إشارة إيجابية تؤكد قدرته على إدارة المنطقة مستقبلاً بشكل مطمئن !!




حقائق لا يُشَوَّش عليها

أمير قطر عمل انقلاب على أبوه وصار أمير.
اي ، لكن هذا لا يغير أبداً من حقيقة أنو بيت الأسد فصّلوا دستور البلد على كيفن مشان يركّبوا بشار على كرسي الرئاسة بالوراثة بدولة جمهورية !
أردوغان وابنه متورطين بالفساد وبالرشاوى بتركيا.
اي ، ممكن ، لكن هذا لا يغير أبداً من حقيقة أنو اقتصاد سوريا كلو مشفوط من العائلة الحاكمة والحاشية !
أحمد الجربا اشترى شهادة الحقوق يلي معو بالمصاري.
اي ، ممكن ، لكن هذا لا يغير أبداً من حقيقة أنو الناس طلعت مظاهرات وجيش بشار الأسد قتلن !
عبد الباسط سيدا كزاب ومامعو دكتوراه.
اي ، ممكن ، لكن هذا لا يغير أبداً من حقيقة أنو شباب البلد عم يموتوا تحت التعذيب بالمعتقلات وأهلن عم يُجبَروا يوقعوا على وثيقة تفيد بأن الوفاة طبيعية أو نتيجة حادث أو قتلته العصابات الإرهابية التكفيرية !
فيصل القاسم غش بالامتحان لما كان طالب بجامعة دمشق.
اي ، ممكن ، لكن هذا لا يغير أبداً من حقيقة أنو النظام الأسدي عم يقصف مدن سوريا بالطيران الحربي !
الإخوان المسلمين حطوا برهان غليون بالقيادة فقط كواجهة يتخبوا وراها لأنه علماني ومقبول بالغرب.
اي ، ممكن ، لكن هذا لا يغير أبداً من حقيقة أنو النظام الأسدي باع الجزيرة السورية لحزب العمال الكردستاني وعمل سوريا ساحة تلعب فيها كل التنظيمات المسلحة وأجهزة المخابرات بالعالم !



أمريكا تدافع عن يلي ما دافعت عنن!

مضحك الحديث عن أنو أمريكا تحركت وتدخلت ودافعت عن الآشوريين (كلدان وسريان) في العراق لما تعرضوا لاعتداء من داعش !! لعما هلا هيك صار الحكي !!
للتوضيح ولوضع النقاط على الحروف بما أنو القصة لساتا حامية ومشان بكرا ما يصير الحديث والله كان هيك ولاء ما كان هيك (متل ما صار بقصة الثورة السورية) ، أمريكا ما حركت ساكن من لما بلشت داعش تشرّد وتهجّر وتقتل وتستبيح الآشوريين (كلدان وسريان) بنينوى، لكن الطائرات بدون طيار كانت جاهزة فوراً وعلى أتم الاستعداد وصارت فوق العراق بسرعة البرق وعم تقصف داعش بمجرد أنو صار في احتمال داعش تقرّب من إربيل!




وسوريا ؟!

عم حاول دور على شي جماعة أو تنظيم سياسي سوري من بين الجماعات والتنظيمات السياسية في سوريا يكون سوري، ما عم شوف! عن جد مافي! ما حدا مقتنع بهالكيان يلي مساحتو ١٨٥ ألف كيلو متر مربع على أنه دولة اسمها سوريا وفيها شعب اسمو شعب سوري!
جماعة الشيوعية بينطلقوا في تعاملن مع سوريا من أنها جزء من الاتحاد السوفييتي، شايفين سوريا (والعالم كلو حتى) كيان مؤقت لابد من زواله لتحقيق الرؤية الشيوعية، شايفين سوريا كيان مؤقت لابد من زواله لتحقيق الهدف الأساسي يلي هوي شكل العقد الاجتماعي الجديد بين الفرد والدولة حسب الرؤية الشيوعية (اقتصادياً واجتماعياً)، ومرجعيتن هوي ماركس ومو شايفين سوريا أكتر من انتماء ضيق مرحلي زائل للوصول إلى انتماء أساسي وأهم وأكبر سيحتل العالم كله وليس فقط سوريا هو الشيوعية.
جماعة القومية العربية (البعث وغيرو) بينطلقوا في تعاملن مع سوريا من أنها جزء من الوطن العربي، شايفين سوريا كيان مؤقت لابد من زواله لتحقيق الهدف الأساسي يلي هوي الدولة العربية الواحدة، ومرجعيتن هية العروبة والأمة العربية ومو شايفين سوريا أكتر من انتماء ضيق مرحلي زائل للوصول إلى انتماء أساسي أهم وأكبر هو الأمة العربية.
جماعة القومية السورية بينطلقوا في تعاملن مع سوريا من أنها جزء من “سوريا الطبيعية” يلي بتشمل سوريا ولبنان وفلسطين والأردن والعراق والكويت وغيرن شوي هون وشوي هون، شايفين سوريا كيان مؤقت لابد من زواله لتحقيق الهدف الأساسي يلي هوي الدولة السورية الواحدة، ومرجعيتن هية السورية (السورية حسب وجهة نظرن طبعاً، مو سوريا سوريا الحالية).
جماعة الكورد أصلاً حدث ولا حرج، بينطلقوا في تعاملن مع سوريا من أنها جزء من “كردستان”، مو شايفين سوريا أكتر من كيان مؤقت لابد من زواله لتحقيق الهدف الأساسي يلي هوي الدولة الكردية “كردستان”، ومرجعيتن هية الكورد والانتماء الكوردي ومو شايفين سوريا أكتر من انتماء ضيق مرحلي زائل للوصول إلى انتماء أساسي أهم وأكبر هو دولة “كردستان”.
جماعة الإسلام السياسي هدوك طبعاً بينطلقوا في تعاملن مع سوريا من أنها جزء من “بلاد المسلمين”، شايفين سوريا كيان مؤقت لابد من زواله لتحقيق الهدف الأساسي يلي هوي وحدة المسلمين جميعاً تحت راية الإسلام وفق شريعة الإسلام، ومرجعيتن هية الشريعة الإسلامية ومو شايفين سوريا أكتر من انتماء ضيق مرحلي زائل للوصول إلى الأمة الإسلامية الواحدة.




أنا وداعش

في مين عم يسأل ويستغرب أنو ليش من ضمن كل كلامي وبوستات الانتقاد والتعليق تبعي ما بجيب سيرة داعش أو النصرة شي مرة علماً أنن عم يعملوا فظائع؟
السبب ببساطة جداً لأنو من السخافة جداً شرح المشروح وتوضيح الواضح والبديهي لهالدرجة ، من السخافة وتضييع الوقت والغباء الحكي بشي بديهي لهالدرجة ومن المسلّمات ! قال ليش ماعم تحكي عن النصرة وداعش !!؟ لعما أنو لازم أقول أني مو معن لحتى تعرفوا أني مو معن !!!!!!!!؟
طيب يالله تفضلوا توضيحات إلى بطيئي الفهم والاستيعاب يلي تفكيرن مربع ومابيعتمدوا على عقلن وإنما فقط عالمعلومات الجاهزة المقروءة و المسموعة المقدمة ألن ديليفري:
١- أنا مو مع التمييز الديني ولا مع السلطة الدينية بأي شكل من الأشكال.
٢ – داعش وأخواتها مع التمييز الديني والسلطة الدينية.
٣ – يؤدي أنا مو مع داعش وأخواتها.
وصلت؟
برافو
بكرا تسميع
صحي ، بالمناسبة كمان أنا مو مع القاعدة والفكر الجهادي للي حابب يعرف ولسا مو عرفان.