الأرشيف الشهري: أبريل, 2013

هلا تزكروتوا النفط !

هاليومين ما ضل عند سياسيي وإعلاميي النظام شغلة وعملة غير قصة أنو شلون المعارضة بدها تبيع النفط من المناطق المسيطرة عليها .. يعني واللهي يلي بيسمعن وهني عم يحكوا عن النفط وهلقد مزعوجين وساخطين من الموضوع بيفكر نحنا السوريين كنا نتنعّم بواردات النفط أيام حكم النظام ، بيفكر النظام كان طامرنا طمر بأموال النفط يلي كان يبيعو !! بيفكر كان معيشنا برفاهية ما بعدها رفاهية من ورا واردات النفط !!
أنو لعما بعيونكن هلا تزكرتوا أموال النفط !! اي من المعروف أنو من يوم يومو وارد النفط السوري ما بيدخل بميزانية الدولة وبيروح كامل مكمل متل ما هوي لبيت الأسد وشركاءن !!
تذكرت على هالسيرة، بزمانو في إحدى جلسات مجلس الشعب السوري سأل أحد أعضاء مجلس الشعب عن واردات النفط وأنو وين عم تروح وطرح موضوع أنو ليش ما عم تدخل بموازنات الدولة؟ فجاوبه بوقتا فوراً رئيس مجلس الشعب السوري وبالحرف الواحد “قعود مو شغلتك ، لا تخاف النفط في أيدي أمينة” !
ومن هداك اليوم لهلا ما عرفنا مين أمينة؟!



نعملّو دورات حرية مثلاً ؟!

سؤال جيوتكتيكي:
في فكرة شائعة كتير (وخصوصاً من جماعة الـ anti-حرية) أنو الشعب السوري ماعندو الوعي الكافي لينعطى حرية وديمقراطية ، لأنو أصلاً ما عندو ثقافة الحرية وثقافة الديمقراطية لحتى يعرف يمارسن إذا حصل عليهن.
طيب إذا الشعب السوري ما عندو ثقافة الحرية والديمقراطية ومانو فهمانن ومابيعرف يمارسن نتيجة قلة الوعي، طيب شلون رح يتعلّم إذا ما جرّب ؟ أنو شلون رح يتشكل عندو هالوعي إذا ما جرّبن وخربط ورجع جرّب وفشل وكمان جرّب لحتى يزبط الفلم ؟ مو لازم يجرّبن لحتى يتعلّمن ؟؟
ولا يعني نعمل للشعب دورات حرية مكثفة بشي معهد لحتى يجيب علامة نجاح بامتحان الوعي لحتى يصير يستحق أنو نعطيه حرية ؟



عزيزي يلي عايش برا

((فكرة قديمة عم تنقر علي هالفترة))
عزيزي يلي عايش برا ، سواءً كنت من المهاجرين القدامى (يعني صارلك أبو 20 – 30 سنة أو أكتر برا) أو من المهاجرين الجدد (يعني شغلة أبو سنتين تلاتة أو أقل) ، أو حتى من يلي رايحلو شي مرة مـ**ط بأوروربا بزمانو ..
عزيزي بيكفي تحكيلنا عن أشياء تافهة من نتاج الحضارة وكأنك عم تحكيلنا عن شي أعجوبة ! يعني لهلا المغترب (أو حتى يلي رايحلو شي مرة بحياتو على شي دولة متقدمة و شامم هواها) مفكر لما بيحكيلنا عن شغلات متل المواقف المأجورة أو الدفع الإلكتروني أو أجهزة الملاحة مثلاً ، كأنو عم يحكيلنا عن شي من الخيال العلمي ! كأنو عم يحكيلنا على شي خارج قدرة العقل عالاستيعاب ! كأنو عم يحكيلنا عن شي بيذهلنا إذهال ! شي بيشلّ ! شي بيعقد ! لأ ودائماً بيكون مستني نأظهر تعجبنا وذهولنا و عدم قدرتنا على استيعاب هالابتكارات والمعجزات يلي وصلانينلها و عم يحكيلنا عنها !
عزيزي والله فهمنا ولو ! فهمنا ياخي ! هالقصص هية اختراعات أكيد و تدلّ عالحضارة أكيدين ونتاج للعلم والتكنولوجيا والتقدم 3 أكيدات .. بس أولاً مو أنت وسلالتك يلي مخترعينها للأجانب حبيب قلبي، أنت موجود بمكان فيك تستخدم هالحضارة يلي موفرينلك هية صحيح (وبكتير من الأحيان أنت لسا مو هاضمها كلها حتى) فبيكفي تصرع سمانا ووأنت عم تحكيلنا عنها وبفخر وكأنو أبوك مخترعها ! تانياً صحيح معظم الأنظمة الحضارية والتكنولوجية غير متوفرة بدول العالم التالت بس مو معناتو ما بنعرف أنو في هيك شي مثلاً و مو معناتو مابنعرف شلون بتشتغل هالأشياء و مو معناتو شايفينا اختراع صاروخ !