الأرشيف الشهري: مارس, 2013

الأسد يتحدى الغرب

أ : الغرب حذر الأسد من استخدام الكيماوي واعتبره خط أحمر
ب : بس فعلاً الأسد تحداهن ووقف بوجهن وأثبت عدم خضوعه لإرادتهن
أ : شلون ؟
ب : ضرب حلب بالكيماوي !!



أخطاء مسيحية شائعة

معلومات للمسيحيين :
المسيح ما قال “الرجل هو رأس المرأة” .
والمسيح ما قال ممنوع تعدد الزوجات .
والمسيح ما حكى شي بخصوص صوم الجمعة والأربعاء و صوم الأعياد و صوم القديسين و … الخ .
والمسيح ما حكى شي بخصوص عادة فساتين الندر و هالقصص .
والمسيح ما حكى شي بخصوص كل هالبروتوكولات والشعائر الكنسية الممارسة اليوم .
والمسيح ما قال ما بيصير تطلع المرأة عالهيكل .
والمسيح ما قال سر الكهنوت تستثنى منه المرأة .
والمسيح ما قال ما بيصير مسيحي يتزوج غير مسيحية أو مسيحية تتزوج غير مسيحي .
والمسيح ما قال رجل الدين لازم ما يتزوج .

للعلم يعني ، كل هالقوانين والقواعد اخترعها مار بطرس و رفقاتو وليس المسيح !




لا تواخزونا الثورة مانا قدّ المقام

اي لا تواخزونا الثورة مانا قد المقام ، إذا مو مفكرين و مثقفين وفلاسفة ما بترضوا عن الثورة وما بتسموها ثورة أصلاً ! لأنو أنتو جماعة قاعدين عم تتفرجوا وتستنوا لحتى الثورة تصير قد المقام وتعبي راسكن وبس نازلين فيها ملاحظات ونقد وسبسبة لأنها ما عبت راسكن لسا لأنو أغلبية القائمين عليها عالأرض مانن مثقفين !! هلا أولاً سوريا معباية عالم فهمانة بس طبعاً ما حدا ألو خبر فين بسبب النظام القمعي، والثورة السورية فيها ناس فهمانة وفيها مثقفين وفيها مفكرين وفيها واعيين وفيها عالم فهمانة تطرح طروحات جيدة بس طبعاً أنتو حتى هدول مو شايفينن و قد ما حكوا أفكار صحيحة وجيدة أنتو مو شاطرين غير تسبسبون لمجرد أنن ضد النظام ! هيك ها لمجرد أنن ضد النظام ! برهان غليون و ميشيل كيلو و هيثم مناع و حازم نهار وكمال اللبواني و غيرن كتار كتار كتار كلن ناس فهمانة وواعية ومثقفة وليبراليين وعلمانيين وديمقراطيين ومخ كل واحد منن يوزن 100 من شكيلات بيت الأسد ، بس طبعاً أنتو مو شاطرين غير تسبون لمجرد أنن عم ينتقدوا النظام ! هيك ها ، مفكر متل برهان غليون على سبيل المثال ، صار زبالة فقط لمجرد أنو هوي ضد النظام !! فالقصة مانا أنو مافي عالم فهمانة ، العالم الفهمانة موجودة بس أنتو مو رايدين تشوفوا غير جماعة الله وأكبر وجماعة جبهة النصرة (يلي هني موجودين طبعاً ما قلت مو موجودين) !! تانياً الثورة طول الفترة الأولى لما كانت سلمية كمان كنتو ضدها ! مع أنها كانت سلمية وما كان في جيش حر لسا ! بس مع ذلك كنتو ضدها ! فالقصة مانا لأنو هلا صار تسليح أو لأنو هلا صار جماعات متطرفة متل جبهة النصرة وغيرها .. تالتاً مابعرف شلون تشكلت عندكن قناعة أنو والله الثورة لازم يعملها مفكرين وفلاسفة ومثقفين فقط !! يعني هيك أنتو متخيلين العالم لازم تنزل مظاهرات وهية لابسة طقوم رسمية وقاعدة جلسة صحية وعم تسمع شي مقطوعة لبيتهوفن لحتى تتأكوا أنن سلميين وحضاريين وواعيين !! يا جماعة لمعلوماتكن ، بكل الثورات يلي صارت بالعالم وبأهم الثورات يلي صارت بالتاريخ ويلي عم نلمس نتائجها اليوم متل الثورة الفرنسية والثورة الروسية والثورة الأمريكية و … الخ ما كانت ثورات مثالية متل ما أنتن متخيلين على فكرة ! وما قام فيها بس مفكرين وفلاسفة ونخبة المجتمع !! وما أجت نتائجها بشغلة سنة و سنتين !! يعني مضحكة هية هالآلية يلي متخيلينا أنو واللهي هيك بشغلة سنة زمان أجوا كم مفكر وفيلسوف ومثقف قعدوا قالوا بدنا نعمل ثورة واتفقوا على مبادئ وأفكار معينة و نشروها بالمجتمع وخالصين صارت الثورة وتحقق كل شي !!!! للعلم يعني ، كل ثورة منن صار فيها تخبيص ليوم التخبيص وكل دولة من هالدول دخلت بمعمعة أكبر بكتييير من المعمعة يلي داخلة فيها سوريا اليوم لحتى قدرت بعدين بالأخير وبعد معاناة تفرز المجتمعات الحضارية يلي عم تشوفوها اليوم وتفكروا أنو بزمانو اجتمعلو كم مفكر وفيلسوف وخرطوا هالمجتمع هيك خراطة شقفة وحدة !!
رئيس النظام نفسو قال : إلى رمضان 2011 كانت مظاهرات سلمية (يعني الـ6 شهور الأولى) ، يعني الـ6 شهور الأولى العالم كان تاكل رصاص وتسكت وما حدا شال سلاح بوقتا ولا كان في إسلاميين جايين من برا (وطبعاً بوقتا أنتو كنتو مبسوطين ومكيفين شلون النظام عم يبيدن لهالكلاب يلي بدن حرية) ، بس وبعدين يعني ؟ شو رأيكن كان يستنوا لحتى النظام يبيدن عالأخير وهني عم يتفرجوا عليه ؟! أكيد ما رح يستنوا لينهين عالأخير وهني عم يتفرجوا عليه ، أكيد هني كمان رح يشيلوا سلاح ويقاوموه ويلي رح يشيل سلاح ويقاوم أكيد ما رح يكون دكتور الجامعة ولا المثقف ولا المفكر !!



حامي الشعب

AssadProtectingSystem



تشريح الثورة بأسلوب علمي

situation_analysis

اشتغلت هالخط البياني كمحاولة لتبسيط الفكرة لعلّ وعسى يستوعب يلي لهلا لسّا ما استوعبوا ..
متل مو واضح بالشكل عنا محورين ، محور بيمثل مستوى الدولة والمجتمع الحضاري والإنساني (الأرقام هية مجرد ترقيم، كل ما زاد الرقم فيه فهذا يعني أنو الدولة قربت أكتر من النموذج الأفضل للمجتمعات من حيث احترام حقوق الإنسان و الديمقراطية و الحرية و المجتمع المدني و مستوى دخل ورفاهية الشعب و الحضارة العلمية و … الخ) ، المحور التاني بيمثل الزمن ، الخط البياني الأزرق بيمثل وضع سوريا بالنسبة للمحورين (وضع البلد مع مرور الزمن) ..
المخطط واضح بتصور ، نحنا حالياً بالفترة الزمنية يلي بالأخضر الفاتح ، والهدف هوي الفترة الزمنية يلي بالأخضر الغامق ، بس يلي بدي قولو شغلتين :
أولاً للي لسّا ماشيين بمنطق “شوفوا يلي صار بالبلد ! هاد يلي أجانا من الحرية يلي كنتوا تطالبوا فيها!” : حبيباتي بكل بساطة طلعوا بالمخطط ، نحن هلا حالياً بالفترة يلي بالأخضر الفاتح ، يعني لسا ما وصلنا للحرية يلي كنا عم نطالب فيا ، يعني لاء مو هاد يلي أجانا من البطيخة يلي كنا نطالب فيا ، لسّا يلي كنا عم نطالب فيه ما أجى ، ولسّا مطول شوي ليجي ، الفترة يلي بالأخضر الغامق هية يلي فيها يلي كنا عم نطالب فيه ، بس نوصلها بنحكي وبنتواجه وبوقتا قولولي “هاد يلي أجانا من الحرية يلي كنتوا تطالبوا فيها!” وبوقتا يفترض أني قلكن “اي هاد يلي أجانا من الحرية يلي نحنا كنا عم نطالب فيها وفي ناس ماتت مشانا ويلي أنتو ما كان بدكن هية وكنتو عم تحاربونا لأنو بدنا هية”.
تانياً للي بيعرفوا هالمعادلة منيح بس ببساطة مو مستعدين يدفعوا الضريبة (الضريبة هية المرور بالمراحل يلي من عند الأخضر الفاتح وحتى الوصول إلى الأخضر الغامق) لحتى يتحقق انتقال بوضع البلد من الـ15 لحوالي الـ60 ، وغالباً هدول بيكونوا من الكبار بالعمر ، مو ختايرة بس أنو كبار ، يعني بأعمار تقريباً بين التلاتينات والخمسينات وبيكونوا جديد بلشوا يقطفوا ثمار حياتن ويعيشوا سنوات الأوج بحياتن ، فبتنحسب معن على الشكل التالي : أنو لا حبيبي مو مستعدين نقضي سنوات عزّ حياتنا ونحن عم ندفع الضريبة ومانعيش يومين حلوين بحياتنا لحتى والله بعديييين بالأخير بس نختير وما يضل من الحياة شي جدييييد نكون وصلنا بوضع البلد لحوالي الـ60 ، اي لا والله خلينا نقضي هالكم سنة من حياتنا بالبلد متل ماهوي على وضع الـ15 قبلانين فيه وبلا ما نخسر هالـ15 كمان ونقضي أهم سنين حياتنا ونحن عم ندفع ضريبة شي ما رح نشوفو .. (في كتير ناس هيك على فكرة) .. للي عم يحسبها هيك رح أحسبها أنا كمان متلو ببساطة ، أوكي أنا لسّا عندي وقت قدامي وماعندي مشكلة بدفع الضريبة وشايفها محرزة كتير أنو ندفع هيك ضريبة لننتقل من الـ15 للـ60 مع تقدّم مستمر ، لأنو مافي ولا طريقة تانية ممكن من خلالها يصير هالتغير على الإطلاق (إلا يلي مقتنعين أنو نظام الأسد ممكن هوي لحالو يغير عقليتو ويتحرك بالدولة للأفضل ، هدول ما عندي شي أحكيه معن نهائياً).