الأرشيف الشهري: ديسمبر, 2012

تنحي !؟

عم تلاحظوا معي أنو هلا الخلاف صاير على طريقة وأسلوب التنحي مو على فكرة التنحي ؟
– أنو لهلا مجرد الحكي عن انتخابات كان شي مو خاطر عالبال حتى ، اليوم عم يحكوا عن انتخابات وعن أنو هوي بدو يكون واحد من المرشحين (طبعاً من أنفي بيصير هالشي يعني ، بس أنو المهم هالحكي مطروح) !
– لهلا كان مجرد الحكي عن التنحي مو وارد بنوب ، اليوم صار ينحكى عن أنو “بيتنحى أو ما بيتنحى هاد شي هوي بيقررو وما بيجيه بضغوط وهوي بيقرر أيمت يتنحى” !



التلفزيون والاستجحاش

بجولتي التلفزيونية الصباحية اليوم اكتشفتلكن أنو مو بس التلفزيون السوري بيستجحش الناس .. بجولتي التلفزيونية على هالمحطات شفت ما يلي :

– طالع على إحدى المحطات عرض لسيارات جديدة (من جينيرال موتورز إذا ماني غلطان) بس الفلم أنو مع كل سيارة مطالعين وحدة مدري عارضة أزياء مدري عارضة غير شي ، شغلتا أنو بس هيك تمشي وتوقف قدام السيارة لحتى الناس تحبّ السيارة !

– على محطة تانية طالع مايك فغالي عم يخبر الناس (وبكل جدّية) شو رح يصير معن بالسنة الجديدة .. انتبهوا هاه ، عم “يخبّرن” لحتّى “يعرفوا” مو أنو عم “يتوقع” توقّع مثلاً ! لاء و عم يتأسف و يتمسخر أنو “حتى السياسيين صاروا يتوقعوا” !!! لعما على هالشغلة والله مو ناقصنا غير بكرا الاقتصاديين كمان يجوا يحكولنا بالاقتصاد ! فعلاً هَزُلت !

– على محطة تالتة طالع مسلسل تركي عم يعالج موضوع بالغ بالغ الأهمية ، أنو إذا واحد مرت أبوه بتتآمر عليه مع ابن خالتو يلي مو من نفس الأم لحتى ياخدوا نطاف من أخوه و يحقنوها لمرتو القبل السابقة لأنو كان في جكارة قديمة بين ابن عمو و زوج بنت خالتو وبعدين الولد حَب ابن ابن خالة أبوه يلي كان متآمر مع مرت الأب فزوج بنت خالتو شو رح يكون موقفو بوقتا !

– التلفزيون السورييييي .. حبيب قلبنا .. عم يحكي عن شغلة مدري بفنّ المسرح مدري بتنمية الرياضة عند الطفل الله وكيلكن مافهمت شو هية !




من إليسا إلى أبو محمد الجولاني

شب كان معي بالجامعة .. كان مظهرو كوول بيلبس جينز وبيحط جيل وبيعلك علكة وبيسمع إليسا وبيطبق بنات و .. الخ … اليوم مسمي حالو عالفيسبوك “عزة الإسلام” وحاطط صورة بروفايلو صورة المجاهد الشيشاني الأمير خطاب ونازل بوستات صباحاً مساءً عن “الكلاب النصيريين الأنجاس من الطائفة النصيرية النجسة لعنة الله عليهم أحفاد القرامطة النصيريين وعلى الروافض الأنجاس” وصورو كلها شي راية القاعدة وشي راية جبهة النصرة ..
يلعن ديبك يا عابد ! لعما حتى أنت طلعت الحرية يلي كنت تحكي لباسل عنها غير الحرية يلي كان بدي هية !!
o.O o.O o.O

(ملاحظة: الأسماء مستعارة)



شلون مات مشاني !؟

بمناسبة حضوري للقداس مبارح ، تفتّقت عندي تساؤلات قديمة ..
وبعدين بقى مع هالقصة ! لسا حاطين الزلمي برقبتنا !
اي بدي أكتبا عالفيسبوك خلي هالعالم تقرا ..
أنو شلون يعني المسيح مات مشاني !!؟ يالله هاتوا لنشوف من وين لوين لتحطوا الزلمي برقبتنا هيك لا آكلين لا شاربين !؟ قال المسيح مات مشانك !! أنو أنا العبد الببوك شو دخلني يا شباب !؟
لأ والأفظع أنو قال نحن هلا حاملين الخطيئة الأصلية ! أنو يعني شو ؟ يعني هلا هلا اليوم لما يولد طفل جديد فمن لما يولد بيجي هيك مختوم ختم بالخطيئة الأصلية !! بس لأنو قبل ملايين السنين جدو كان أكل خـ*ا و أكل التفاحة !! فأنو خلص هيك مخطئ وخالصين نقطة انتهى بدون سبب !
عدا عن أسطورة أنو الله بعت المسيح واليهود قتلوه لأنو كان بدو يسامحنا !! أنو كتير كان صعب عليه يطالع شي مرسوم أو فرمان أنو يا شعبي يا مخلوقاتي الحلوين يا جيجاتي الحبابين حبيباتي خلص سماح وخالصين ! يعني ضرورية الدراما !!؟
أو مثلاً وين العبرة من أنو كل الناس لازم تضل تشعر بالذنب وبالحزن و الامتعاض طول عمرا أمام الله ؟! و شعور أننا كلاب وتافهين ما لازم يفارقنا ، أنو هادا آدم آكل التفاحة وفوقا المسيح مات مشانا يعني فأقلها ما نضل نحس بالذنب !
يعني والله أتوقع القليل من المنطق لا يضرّ !
(وميري كريستماس للكل ^_^)




شهيد وضحية بريئة !

مشان يلي كتير زعلانين و محموقين على قتلى الجيش (أو يعني يلي بيسمّون “شهداء”) ، و أنو يا حرام ومساكين و شو دخلن و قتلن إجرام و من هالحكي .. يعني والله أمركن عجيب ! حبيباتي في واقع ، الواقع هوي أنو في حرب بين جيشين ، الجيش الأسدي (يلي هوي بقايا الجيش النظامي) و الجيش الحرّ .. الجيش الأسدي عم يحارب مشان عيون بيت الأسد و الجيش الحر عم يحارب (على فرض) مشان الرسول و الصحابة ، وجودك في صفوف واحد من هالجيشين يعني أنك عم تحارب معو لأجل قضيتو ، و طالما في حالة حرب فهذا يعني أنك هدف للجيش التاني قولاً واحداً ، فإذا أنت زلمي ما ألك بهالشغلة ومو تبع قضية ما قضية ، أو عالأقل مو مع ولا قضية من هالقضيتين السابقتين احمل حالك و وينك يا الهريبة ، بس والله قاعدلي في أحضان الجيش الأسدي والجيش في حالة حرب وقال أنت ما ألك علاقة بريء و مظلوم يا حرام قتلوك ظلماً !! شو مشان أنك جحش ؟! إذا ما دخلك وما إلك علاقة وما بدك تحارب تصطفل يا حبيب ما حدا شحطك من رقبتك وقالك بالكلاش بدك تترك الجيش الأسدي و تصير مع الحرّ ، بس عالأقل لا تضلّ مع الأسدي إذا مانك مقتنع بقضيتو و بحربو ! أما إذا كنت بقيان نتيجة قناعتك بقضيتو فبَس الجيش الحر يفرجيك إنّ الله حق لا تحط حالك برقبتو كضحية بريئة !! و لا يجي حدا يزعل و ينحمق و أنو والله حرام مسكين مظلوم شو دخلو لينقتل !!

طبعاً الكلام ينطبق على يلي بيقدر يترك الجيش الأسدي ويهرب بس ما عملها ، وهدول في منن كتيرين ، ما حدا يقول ما بقدر وظروفي العائلية أو المادية أو غيرها ما بتسمح ، يلي فعلاً بسبب ظروفو ما قدر يترك ويهرب فأكيد هاد مستثنى من الكلام وما بيحقلنا نفتح تمنا عنو ، بس الحكي عن الكتااااااار يلي ظروفن بتسمحلن وبيقدروا يتركوا بس مع هيك اختاروا أنن يضلوا ، إذا بقيان عن قناعة (قناعة بالقضية يلي الجيش الأسدي عم يحارب مشانها) فبس ينقتل لا حدا يقول “ضحية برئية وما ألو ذنب” بل قولوا استشهد في سبيل بيت الأسد !



نسيوا الطيارات

عم أتساءل أنو عن جد مو غريب مؤسسة الطيران السورية مو حاطة صور الرئيس عالطيارات السورية !؟
عن جد عن جد عم أحكي .. يعني هية صحيح قباحة ، بس أنو عادي ، يلي بيعمل كل هالقباحات غريب ما يعمل هاي !!