نقاش المنحبكجي

نقاش المنحبكجي : (طبعاً حطلي كلمة نقاش بين شي 2000 قوس)
يستخدم خلال “نقاشه” أفكار مثل :
-“يعني أمريكا كتير سئلانة عن المواطن السوري و خايفة على حقوقو !؟”
-“يعني بأميركا وأوروبا مافي فقر و بطالة و فساد !؟”
-“يعني هلا الغرب صار حريص على حقوق الإنسان !؟”
-“وين كانوا لما فلسطين و العراق و أفغانستان و الموزنبيق و الهولولولو و الصومال و جنوب طاجكستان و طششش اممم فههل لللل بففففف يعععع …”
-“هدول كلن ماسونيين .”
-“طيب ليش هلا !؟ ليش هلا بهالوقت تحديداً أجى على بالكن تثوروا !؟”

وبيفقعك نظرة هيك من طرف عينو وكأنو جابك عالفي وأفحمك وفوتك بستين حيط من قوة و عظمة الأفكار يلي طرحها…

طيب يا حباب أنا قلتلك أنو سبب ثورتي هوي أنو أمريكا خايفة على حقوقي مثلاً !!؟؟
بعدين بالله شو دخل هالحكي بأنو في ناس عم تموت بسبب رأيها !!؟؟
شو دخل مواقف الغرب تجاه القضية الفلسطينية بالجمهوراثية تبعنا !!؟؟
ولا إذا كانوا كلن ماسونيين فمعناتو ما عنا مظاهرات و الجزيرة كزابة و 99.99% من الشعب بيحبوه !!؟؟
و أخي أجيت معك ، صح بالغرب كمان في شي 2% من الفساد و البطالة و الفقر يلي عنا .. بس شو مشان أنو هاد ما بيبرر القمع وقتل الناس مثلاً !!؟؟
و بخصوص “ليش هلا تحديداً ؟” ، يا سيدي فعلاً فوتتني بالحيط من هول غباء سؤالك ، أنو شو بدي جاوبك يعني !!؟ وين الفكرة بالموضوع !!؟؟ يعني إذا قلتلي “ليش هلا تحديداً” فبتكون أثبتللي أنها مؤامرة على قلعة الصمود و التصدي مثلاً !!؟؟
يا سيدي أنا كمان رح أسألك سؤال فوتك بالحيط أكتر : طيب ليش مو هلا !؟ شفت يالله أنا كمان أثبتللك أنها مانها مؤامرة !!!!!