بخصوص “ألنا نحن المسيحيين أحسن منو مافي”

لكل واحد بيقول “ألنا نحن المسيحيين أحسن منو مافي” … لنفرض فرضاً مثلاً جدلاً أنو كلامك صحيح … بس لحتى تكون أنت في أحسن أحوالك في غيرك عم يموت … وأنت بهالموقف العظيم تبعك عم تحقق أفضل شي لحالك على حساب موت غيرك وما عندك مشكلة !!!!!
ولما بتجي بتقللي “الثورة مو سلمية و هدول كلّن مخرّبين و طائفيين و بدّن يخربوا البلد و عم يكسّروا و يحرقوا” … هلا بالنسبة لـ”طائفيين” طيب يا حباب مو من شوي أنت كنت عم تبني رأيك على أساس طائفي بحت !!!! و بالنسبة لـ”مو سلمية و يخربوا البلد” فأولاً يلي بيسمعك بيفكر البلد وصلان عالقمر ببنيتو التحتية و الفوقية وعم ينافس السّويد وقريباً جداً رح يبلش ينافس سويسرا !!!! وتانياً شو مشان أنو في ثورة بالموضوع !!! بدك الناس تثور و هية قاعدة جلسة صحّية مثلاً !!!!؟ على شو زعلان يعني ؟!! عالتماثيل ولا على مقرات حزب البعث ؟!! ولا على مكاتب سيريتل مثلاً ؟!!