وآخرتها مع هيك جامعة !

يا الله والله مصيبة … مصيبة حقيقية لما تكون الغالبية الساااااااحقة من الكائنات يلي اسمها “طلاب” جايين عالجامعة بس لينجحوا بالفحص !!! فقط لا غير !!! وبأقل معلومات ممكنة !!!!! اي اي عن جد ، بأقل معلومات ممكنة بكل معنى الكلمة !!!!! قمة السعادة عند الـ”طالب” هية أنو الدكتور يلغي موضوع معين وما يحكي عنو !!! يلعن رفك أنت جاي عالجامعة لتتعلم تقوم كل ما الدكتور يلغي شرح موضوع معين أنت تنبسط على حالك أكتر !!!!!! وقمة النصر عندك بتكون لما تقدر تغيب عن محاضرة وما تتسجّل غياب !!! يا بهيم أنت عم تدفع مصاري حق هالساعات و تقوم بعدين تنبسط إذا قدرت تهرب منن (وأنت دافع حقن) !!!! و صاحبنا بينزعجججج كل ما الدكتور شرَح أكتر أو كل ما استاذ العملي حلّ أمثلة أكتر (وكأنو الزلمي نازل ضرب فيه مثلاً) ومستعد يعمل المستحيييل لحتى استاذ العملي يشرح أقل و يحلّ أمثلة أقلّ !!!!! لك ياحيوان أنو أنت غايتك أصلاً هية أنك تنجح بالفحص وبس ، طيب مو لازم تاخد أمثلة أكتر لحتى تقدر تنجح بالبطيخ وتحقق هالهدف السامي تبعك !!!!!! طبعاً كلو كوم وعقدة الحرب يلي بمخ الطالب بينو وبين الدكتور كوم … ما كنت أفهم ليش في قناعة دائماً بعقل الطالب بيتصرف على أساسا ، أنو الدكتور هوي العدوّ !!!!!!!! وبناءً عليها بتصير بتسمع جمل متل : “رسّبني فلان دكتور” !!!!! في تارات قديمة بيناتكون مثلاً لهيك حاقد عليك الدكتور !!! ولا الدكتور هيك يعني بينبسط وبتزيد سعادتو وبيصطهج لما “يرسّبك” !!! طيب شو مشان أنو في معلومات إذا كنت بتعرفا رح تنجح وإذا ما كنت بتعرفا فما رح تنجح !!!! يعني فعل الرسوب ، الفاعل تبعو هوي حضرتك مو الدكتور …. أو ممكن تسمع “فلان دكتور بيساعد وفلان دكتور ما بيساعد” !!!!! واحد منن العصاية تبعو بتوجع أكتر مثلاً !!! شلون يساعد وما يساعد يعني كرمال محمممممد حدا يشرحلي هية !!!؟؟ شو الموضوع جمعية خيرية !؟ ولا حرب و في أعداء أشد قسوة من أعداء تانيين !!؟ بعدين أنت جاي عالجامعة لحتى الدكتور يشرحلك معلومات ويحكيلك عن علم ولا لحتى “يساعدك” !!!؟؟؟ وممكن تسمع كمان “فلان دكتور حمار ما يقبل غير تكتبلو بصم ، أنا كتبتلو من عندي ما عطاني شي” !!!! ولك إذا كاتبلو من عندك (والله أعلم شو بتكون كاتبلو) شو بدك يعطيك !!؟؟ فطبعاً بيطلع معك أنو دكتور “ما بيساعد” و ابن حرام !!!!
ويلي بيقوي وجهو شي مرة و بيجيب سيرة علم ما علم ، أو تعليم ما تعليم ، أو فهم ما فهم ، أو بيستعمل مفردات متل الفكرة ، المعلومة ، الكتاب ، المنهاج ، المبدأ …الخ بتجيه النظرات من كل مكان أنو لعما بعيونك !!! بدك تتعلم حضرتك !!!!؟؟ وبكل عين وقحة جاي تقول بدك تتعلّم !!!! هادا يلي كان ناقصنا !!؟ قال بدو يتعلّم قال !!! لاء و بدو المحاضرة تطوّل كمان !!!؟ ولك لعما وبدو ناخد مواضيع أكتر !!!!!!!!
لنشوف آخرتها…