الاستنتاج بالمنطق المنحبكجي

عزيزي المنحبكجي ..
أنو لما بقول “النظام فاسد و قمعي و ديكتاتوري و شوفيني و إلغائي و إقصائي و مخابراتي” ليش بتفهم من الجملة السابقة أني عم قول بالسعودية في ديمقراطية و انفتاح !!!؟
لما بقول “الاقتصاد السوري تحول لثروات خاصة لكم شخص بينعدوا على أصابع الأيد” ليش بتفهم من الجملة السابقة أني عم قول بباقي دول العالم مافي فقر !!!؟
لما بقول “الدولة تحولت لمزرعة خاصة لسيادة فلان و ابن فلان والشعب خواريف” ليش بتفهم من الجملة السابقة أني عم قول قطر و البحرين هني قمة في العدالة !!!؟
لما بقول “نتائج ما تسمى بالانتخابات بتتجهز مسبقاً ابتداءً بانتخابات الاتحاد الرياضي و انتهاءً باستفتاء الرئاسة” ليش بتفهم من الجملة السابقة أني عم قول في انتخابات ديمقراطية بقطر !!!؟
لما بقول “الإعلام السوري مقموع و كزاب” ليش بتفهم من الجملة السابقة أني عم قول الإعلام بدول الخليج مانو موجه !!!؟
لما بقول “النظام ما عم يقاوم اسرائيل” ليش بتفهم من الجملة السابقة أني عم قول مصر و اسرائيل مانن صحبة !!!؟
لما بقول “اسطوانة قلعة الصمود و التصدي هية كذبة كبيرة” ليش بتفهم من الجملة السابقة أني بدي بيع البلد لاسرائيل !!!؟
لما بقول “النظام عم يخوض حرب ضد المتظاهرين” ليش بتفهم من الجملة السابقة أني عم قول تركيا ما عم تضرب حزب العمال الكردستاني !!!؟
لما بقول “الشباب و الكفاءات البشرية و العلمية السورية تم تحطيمها و تثبيطها و تهجيرها على مدى ال50 سنة السابقة” ليش بتفهم من الجملة السابقة أني عم قول بأميركا مافي حدا عاطل عن العمل !!!؟